Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, amesisitiza umuhimu wa ushirikiano kati ya Serikali na sekta binafsi katika kuimarisha huduma za uthamini na kuchangia utekelezaji wa Dira 2050.

Mhe. Mmuya ameyasema hayo wakati akihutubia Mkutano Mkuu wa Saba wa Wathamini, uliowakutanisha wataalamu wa uthamini kutoka taasisi za Serikali, sekta binafsi, vyama vya kitaaluma na wadau wengine wa sekta ya ardhi.

Amesema sekta binafsi ina nafasi muhimu katika kukuza uchumi, kuboresha utoaji wa huduma na kuongeza fursa za uwekezaji, hivyo kuna umuhimu wa kuimarisha ushirikiano kati yake na Serikali ili kuchochea maendeleo endelevu nchini.

Ameeleza kuwa ushirikiano huo unapaswa kuimarisha mazingira ya ufanyaji kazi kwa wataalamu wa uthamini, kuongeza ufanisi katika utoaji wa huduma na kuwezesha sekta hiyo kutoa mchango mkubwa zaidi katika maendeleo ya kiuchumi na kijamii.

Akizungumzia umuhimu wa mkutano huo, Mhe. Mmuya amesema mikutano ya kitaaluma ni fursa muhimu kwa wadau kubadilishana uzoefu, kujadili changamoto zinazowakabili na kuweka mikakati ya kuboresha huduma za uthamini.

Amesisitiza kuwa wataalamu wa uthamini wanapaswa kuzingatia weledi, uadilifu na uwajibikaji katika utekelezaji wa majukumu yao, akibainisha kuwa huduma bora za uthamini ni muhimu katika kufanya maamuzi ya uwekezaji, usimamizi wa mali na uendelezaji wa milki.

Aidha, amewahimiza wataalamu hao kuendelea kujifunza na kutumia teknolojia katika kuboresha huduma zao ili kuendana na mabadiliko ya kiuchumi na kiteknolojia, pamoja na mahitaji ya maendeleo ya Taifa.

Amesema kuwa kuimarisha taaluma ya uthamini na ushirikiano kati ya Serikali na sekta binafsi ni miongoni mwa maeneo yanayoweza kuchangia katika kufikia malengo ya Dira 2050.

Katika hatua nyingine, Mhe. Mmuya alishiriki katika shughuli za mahafali zilizofanyika sambamba na mkutano huo, ambapo alikabidhi vyeti kwa wahitimu.

Shughuli hiyo ni sehemu muhimu ya kutambua juhudi za wataalamu katika kuendeleza ujuzi na taaluma ya uthamini, ambayo ina mchango katika usimamizi wa mali, tathmini ya thamani ya ardhi na majengo, pamoja na maamuzi yanayohusu uwekezaji.

Kupitia mafunzo na uendelezaji wa wataalamu, sekta ya uthamini inapata fursa ya kuimarisha uwezo wa rasilimali watu, kuongeza ubora wa huduma na kujiandaa kukabiliana na mahitaji yanayoongezeka katika sekta ya ardhi na uchumi kwa ujumla.

Uendelezaji wa wataalamu hao pia ni muhimu katika kujenga sekta binafsi yenye uwezo wa kutoa huduma za kitaaluma kwa ufanisi na kuchangia katika utekelezaji wa vipaumbele vya maendeleo ya Taifa.

Mhe. Mmuya amewapongeza waandaaji wa mkutano huo kwa kuwakutanisha wadau wa uthamini kutoka taasisi mbalimbali, akieleza kuwa majadiliano ya pamoja yana nafasi ya kutoa mapendekezo yatakayosaidia kuimarisha taaluma hiyo.

Mkutano Mkuu wa Saba wa Wathamini unaendelea kuwa jukwaa la kubadilishana uzoefu, kuimarisha ushirikiano na kujadili mikakati ya kuboresha huduma za uthamini nchini. Ushirikiano kati ya Serikali, sekta binafsi na wataalamu wa uthamini unatarajiwa kuwa na mchango katika kuimarisha mazingira ya uwekezaji, uendelezaji wa milki na kufikia malengo ya maendeleo ya Tanzania kuelekea mwaka 2050.